ჩეხეთში წყალდიდობის შედეგად სულ მცირე ექვსი ადამიანი დაიღუპა, – ამის შესახებ “ბიბისი” იუწყება. გამოცემის ინფორმაციით, 8 ადამიანი დაკარგულად ითვლება. წყალდიდობაა გერმანიასა და ავსტრიაშიც, სადაც ერთი ადამიანია დაღუპული. გერმანიაში მდინარე დუნაი ნაპირებიდან გადმოვიდა. ქვეყნის მეტეოროლოგიური სამსახურის ცნობით, მსგავსი რამ გერმანიაში ბოლო ნახევარი საუკუნის განმავლობაში არ მომხდარა. სამივე ქვეყანაში ათასობით ადამიანი ევაკუირებულია.სტიქიის გამო, ჩეხეთში ხელისუფლებამ საგანგებო მდგომარეობა გამოაცხადა. პრაღაში გადაკეტილია ცენტრალური გზები, გაჩერებულია საგარეუბნო მატარებლის მიმოსვლა, მეტრო მხოლოდ ნაწილობრივ მუშაობს. წყლის დონე დედაქალაქში თანადათან მატულობს. პრაღის ზოოპარკიდან გაიყვანეს ცხოველებიც.