RSS

როგორ ავარჩიოთ რძის ნაღების პროდუქტები?

20 მარ

ინფორმაცია იმის შესახებ, როგორ შეარჩიოთ ესა თუ ის პროდუქტი, ხშირად გვაწვდის ინფორმაციას http://www.momxmarebeli.ge/-ს თანამშრომლები, რომლებიც მუშაობენ პროექტის „სასურსათო პროდუქტებს მომხმარებლები აკონტროლებენ“  ფარგლებში. ამჟამად, მომხმარებელს ვთავაზობთ როგორ ავარჩიოთ რძის ნაღების პროდუქტები.

 

ქართულ ბაზარზე ფართოდ არის გავრცელებული რძის ცხიმოვანი პროდუქტების ფალსიფიკაციები, რომლებშიც რძის ცხიმი სხვა ცხოველური ან მცენარეული ცხიმით არის ჩანაცვლებული. დღეს, გთავაზობთ ინფორმაციას იმის შესახებ, რა არის და როგორ აარჩიოთ რძის ნაღების პროდუქტები.

ახლადმოწველილი სოფლის რძე თუ გიყიდიათ, ალბათ შეამჩნევდით, რომ რამდენიმე საათში ის ზედაპირზე სქელ ცხიმოვან ფენას – ნაღებს იყენებს. რძის ქარხნული დამუშავებისას ამ ფენას, როგორც წესი, ხდიან და მისგან სხვადასხვა პროდუქტებს ამზადებენ: ნაღებს, ნაღების სპრედს, არაჟანს, კარაქს. ყველა ამ პროდუქტის ძირითადი შემადგენელი კომპონენტი რძის ცხიმია – უაღრესად სასარგებლო, კალორიული და ადამიანისთვის ადვილად ასათვისებელი ცხიმი. შესაბამისად, მისგან დამზადებული პროდუქტებიც ძალიან გემრიელი და პოპულარულია. თუმცა მათი მოხმარებისას ზომიერების დაცვა აუცილებელია – განსაკუთრებით 3 წლამდე ბავშვებისა და მოხუცებისთვის. პატარებში ცხიმიანი პროდუქტის დიდი ოდენობით მოხმარებამ შეიძლება ფაღარათი გამოიწვიოს. მოხუცები კი რძის ცხიმში არსებულ ქოლესტერინის დიდ რაოდენობას უნდა მოერიდონ. რძის ცხიმოვანი პროდუქტების მიღება არ არის რეკომენდებული ჭარბი წონის, ათეროსკლეროზით ან ღვიძლის დაავადებებით დაავადებული ადამიანებისთვის.

სამწუხაროდ, ბაზარზე ფართოდ არის გავრცელებული რძის ცხიმოვანი პროდუქტების ფალსიფიკაციები, რომლებშიც რძის ცხიმი სხვა ცხოველური ან მცენარეული ცხიმით არის ჩანაცვლებული. შეეცადეთ, ასეთ პროდუქტებს მოერიდოთ – ისინი ნამდვილად არ არის სასარგებლო. მათ გამოსარჩევად ყოველთვის გულდასმით წაიკითხეთ პროდუქტის ეტიკეტი – თუკი შემადენლობაში მითითებულია მცენარეული ცხიმები ან ცხოველის ქონი, ნუ შეიძენთ ასეთ პროდუქტს. ასევე, თუკი კარაქის, არაჟანის ან ნაღების ეტიკეტზე მითითებულია, რომ იგი ქოლესტერინს არ შეიცავს (ან რომ ეს სამარხვო პროდუქტია) – ეს იმას ნიშნავს, რომ თქვენ ნამდვილ პროდუქტს კი არა, მის ფალსიფიკაციას ყიდულობთ.

გაითვალისწინეთ: რძის ნაღები, კარაქი და არაჟანი სითბოში ან მზის სხივებისა და ჟანგბადის მოხვედრისას სწრაფად ფუჭდება, მძაღდება (არაჟანი ამასთან ერთად მჟავდება კიდეც). ამიტომ ეს პროდუქტები აუცილებლად მაცივარში უნდა შეინახოთ. თუ პროდუქტებს ზამთარში გარეთ გადებთ, მოარიდეთ მზის სხივებს.

ზაფხულში კარაქის შენახვა შესაძლებელია წყალში მოთავსებით (ჟანგბადისგან დასაცავად).

გავარჩიოთ რძის ცხიმოვანი პროდუქტები ცალ-ცალკე:

 

კარაქი

კარაქი კონცენტრირებული რძის ცხიმია. საერთაშორისო სტანდარტის მიხედვით კარაქში რძის ცხიმის შემცველობა 80%-ზე მეტი უნდა იყოს. ამ პროდუქტის მთავარი უპირატესობა ის არის, რომ მაღალკალორიულია და ადამიანი მას ადვილად ითვისებს – იმავე რაოდენობის მცენარეული ცხიმი ნაკლებად კალორიულია და გაცილებით რთულად აითვისება. ასე რომ, კარაქი შეუცვლელია, თუ ენერგიის სწრაფად აღდგენა გვინდა.

სითბოში კარაქი ძალიან მალე ფუჭდება. თუმცა მაცივარში იგი 10-20 დღე ინახება, საყინულეში კი 9 თვემდე შეიძლება შეინახოს.

ნაღები

ალბათ დახლზე გინახავთ პროდუქტები დასახელებით: Cream, Half and Half, Table cream, Whipping Cream, Double cream, Сливки – ეს ყველა რძის ნაღებია. ალბათ ათქვეფილი ნაღებიც შეგხვედრიათ აეროზოლის ტიპის შეფუთვაში (წარწერით Whipped cream, Crème Chantilly, Взбитые сливки). ამ პროდუქტებში რძის ცხიმის შემცველობა 8%-დან 35%-მდეა. რძის ცხიმის უფრო მაღალი (30-დან 80%-მდე) შემცველობის პროდუქტები უცხოეთში ნაღების სპრედებად (Diary spreads) მოიხსენიება. თუმცა ყოფილ საბჭოთა ქვეყნებში 60% ცხიმის შემცველ პროდუქტს კარაქადაც მოიხსენიებენ.

ნაღები კარაქზე მაღალი ბიოლოგიური და კვებითი ღირებულებით ხასიათდება: კარაქთან შედარებით მასში მეტია კალციუმი, ფოსფორი, ლეციტინი. იგი ადვილად შეითვისება ორგანიზმის მიერ და სასარგებლოა დასუსტებული, ახლად ნაოპერაციები ადამიანებისათვის. თუმცა ნაღები კარაქზე ბევრად მალე ფუჭდება, მაცივარში პასტერიზებული ნაღები სულ 3 დღე ძლებს, სტერლიზებული კი 6 თვემდე.

არაჟანი

რძის ნაღებში სპეციალური მიკროორგანიზმების (ლაქტობაცილუსის) კულტურის შეყვანით მიიღება ე.წ. „მჟავე ნაღების“ სხვადასხვა სახეობა. უცხოეთში ეს პროდუქტი იყიდება დასახელებებით: Sour cream, Creme Fraiche, Smetana, Schmand. საქართველოში ასეთ პროდუქტს არაჟნის დასახელებით ვიცნობთ.

არაჟანში, მიკროორგანიზმების ზეგავლენით, ნაღების ცხიმები და ცილები ადამიანისთვის უფრო ადვილად ასათვისებელ ფორმაშია გადასული. გარდა ამისა, ორგანიზმისათვის სასარგებლოა რძემჟავა, რომელიც ლაქტობაცილუსის ცხოველქმედების შედეგად წარმოიქმნება, ამიტომ არაჟანი კარაქზე და ნაღებზე უფრო სასარგებლო პროდუქტია.

არაჟნის არჩევისას შეეცადეთ შეიძინოთ პროდუქტი, რომელშიც ბაქტერიული კულტურა ცოცხალია – ის პასტერიზებულ პროდუქტზე ბევრად უფრო სასარგებლოა. ასეთის გამოსაცნობად უბრალოდ წაიკითხეთ პროდუქტის შენახვის ვადა ეტიკეტზე – თუკი ვადა 5 დღეს არ აღემატება, ეს იმას ნიშნავს, რომ არაჟანი პასტერიზებული არ არის და ლაქტობაცილუსის კულტურა მასში ცოცხალია. (ბუნებრივია, გადაამოწმეთ პროდუქტის გამოშვების თარიღიც და ვადაგასულ პროდუქტს ნუ შეიძენთ).

 

კომენტარის დატოვება

Fill in your details below or click an icon to log in:

WordPress.com Logo

You are commenting using your WordPress.com account. Log Out /  შეცვლა )

Google photo

You are commenting using your Google account. Log Out /  შეცვლა )

Twitter picture

You are commenting using your Twitter account. Log Out /  შეცვლა )

Facebook photo

You are commenting using your Facebook account. Log Out /  შეცვლა )

Connecting to %s