საქართველოს და სხვა ქვეყნების კულტურული მემკვიდრეობის და ლანდშაფტურ ძეგლებზე ინოვაციური საინფორმაციო დაფები და საგზაო მიმართულების მანიშნებლები განთავსდა. აღნიშნულთან დაკავშირებით, ფონდი „ტაძრელი“ და ახალციხის მერია რაბათის ციხე-ქალაქის კომპლექსში ევროკავშირის ფინანსური მხარდაჭერით განხორციელებული პროექტის – „შავი ზღვის აბრეშუმის გზის კორიდორის“ პრეზენტაციას დღეს, რაბათში 17:00-ზე გამართავენ.

პროექტი 5 პარტნიორისა და 4 ქვეყნის (საქართველო, საბერძნეთი, თურქეთი, სომხეთი)  საერთაშორისო კულტურული თანამშრომლობის ტრიუმფია და მას  საქართველოში ფონდი „ტაძრელი“ ახორციელებს. ფონდის  ვიცე-პრეზიდენტის სიმონ კოპაძის თქმით, საინფორმაციო დაფებზე QR კოდიც იქნება დატანილი, რისი საშუალებითაც მობილური ტელეფონების თუ პლანშეტების გამოყენებით ტურისტები ყველა ინფორმაციის მიღებას შეძლებენ.

„პროექტი სამი ძირითადი კომპონენტისაგან შედგება. ესენია: რეალური გზა, რომელიც შედგება 60 კულტურული – ისტორიული მნიშვნელობის ძეგლისგან და მარკირებულია 60 ინფო პანელითა და 8 საგზაო მანიშნით; მეორე – ვირტუალური ელექტროგზა, რომელიც მოიცავს ვებპორტალს, 5 სმარტფონის აპლიკაციას მულტიმედიური შინაარსის მონაცემთა ბაზით, სოციალურ ქსელში ინტეგრაციით და ვირუსული მარკეტინგით და  მესამე – ონლაინცნობარი, რომელიც საშუალებას მისცემს ადგილობრივ პროვაიდერებს, უზრუნველყონ მათი მომსახურება: საცხოვრებელი, კვება, ადგილობრივი საქმიანობა, სუვენირები, ხელობა, ადგილობრივი გიდები და სხვა“.

საინფორმაციო ბანერები 60 ისტორიულ-კულტურულ ძეგლებზე განთავსდა. მათ შორის: ვარძიაში, ხერთვისში, რაბათში, აწყურში, ბორჯომ-ხარაგაულის ეროვნულ პარკსა და სხვა ძეგლებზე. დღეს კი, პროექტის პრეზენტაციაზე სტუმრბს შესაძლებლობა ექნებათ დაათვალიერონ როგორც მუზეუმი, ისე რაბათის ციხე-ქალაქის კომპლექსი და უნიკალური საარქივო ფოტოგამოფენა და დაესწრონ მუსიკალურ ჯგუფ „სახიობას“ კონცერტს. პროექტის საინფორმაციო მხარდამჭერია ანალიტიკური პორტალი “კვირა“.