ოლიკო ცისკარიშვილი

ზღვის დონიდან 1850 მეტრზე ისტორიულ არტაანის ტერიტორიაზე, როგორც ვარაუდობენ ჭინჭრობის ბაზილიკური ტაძრის ნანგრევებია. ამჟამად ეს ნანგრევები ნაგავსაყრელადაა ქცეული. სამწუხარო ფაქტია, რომ ბოლო სამი თვის განმავლობაში ტაძრის მახლობლად, ორიოდე მეტრში, მიმდინარეობს საავტომობილო გზის მშენებლობა, რომელიც აზიანებს ამ ტაძარს. გეოგრაფ გიორგი დვალაშვილის თქმით, ეს გზა არტაანის შემოვლითი გზაა, რომელიც აკავშირებს ყარს ერზერუმთან და სხვა პროვინციებთან. “აქ მიმდინარეობს საკმაოდ მძლავრი სამუშაოები და არაა გამორიცხული, რომ უახლოეს მომავალში, ტაძრის მახლობლად მოხდეს ინერტული მასალების ჩაყრა და ტაძარი, ფაქტობრივად, ამ ნაშალი მასალების დაგროვების შედეგად შეიძლება, მთლიანად თუ არა ნაწილობრივ, მაინც დაიფაროს,” – ამბობს გიორგი დვალაშვილი. ტაძრის შესახებ მწირი ინფორმაციაა. თუმცა, ქართული ხუროთმოძღვრების კვალი აშკარადაა და სამწუხაროდ, ნანგრევების სახითაა დღეს შემორჩენილი, შეინიშნება ,,განძის მაძიებლების“ მიერ ტაძრის გადათხრის კვალიც.

ტაძარის საძირკველთან, გზის გაყვანამდე  ხევი გადიოდა, რომელიც  გზის მშენებლობისას ჩაიკეტა. ხევში  წყალმოვარდნის გამო, დაზიანებულია ტაძრის ბალავარი. და თუ არ გამაგრდა, დარჩენილი საკურთხევლის კედელიც ჩამოინგრევის საფრთხის ქვეშაა.

იმედია, თურქეთის ხელისუფლება, გზის გამო, ტაძარს საბოლოოდ, დასაღუპად არ გაწირავს.